薑母糖蒸蛋糕

睇咗電視教整嘅蒸蛋糕，

心思思想試吓整嚟食！

早排收到家姐喺香港寄嚟嘅薑母糖，

見原產地係菲律賓；

又有食療功效，

仲係有機原糖！

用嚟整蛋糕都啱，

只係未夠份量，

所以我就另加多咗 D 普通黑糖嚟整！

蒸咗出嚟試食後覺得薑味都好重，

但係就唔多辣！

最好就係細豬小姐都接受到，

無厭棄！

佢話睇個蛋糕外貌似係朱古力味 o添喎！

我就想返香港再要買嚟整畀屋企人食嘞！

老懷安慰 !

21-5-2014

又大一歲嚕 !

年紀大咗就好想屋企人陪我過生日 !

好彩今年阿 Sir 同細囡豬喺呢豎陪我 !

今年好想整個黑朱古力慕絲蛋糕畀自己，

所以 o尋日一早就動手做喇 !

有阿 Sir 幫手就快好多 !

因為趕起個蛋糕就要去醫院做針炙 !

今朝剛啱細囡豬可以返晏 D，

畀佢負責設計個蛋糕嘅裝飾 !

合我哋三人之力就整咗個咁紅嘅生日蛋糕；

真係好滿意 !

插支綠色蠟燭就襯晒 !

以為大豬小姐要忙住考試唔得閒理我，

點知喺未切蛋糕前就收到佢嘅留言；

喺嗰一刻就覺得更加老懷安慰 !

一分錢，一分貨！

月頭喺 Currys 攞到嗰張 Voucher 之後就立即訂咗另一個牌子,

訂嗰陣又話五個工作日就有貨，

點知都要等咗兩個星期先有貨 !

雖然係要加錢去換呢部 Kenwood ，

 但真係物有所值 !

而且仲可以買 D 配件一齊用。

同細囡豬商量過，

最後都訂咗個 Pasta Marker。

 唔舒服咗幾日，

終於剪綵開工整包包。

好滿意部機，

唔需要將速度較到好大就已經做到預期嘅效果，

果然係一分錢，

一分貨 !

Cupcake 粉

上次表姐去美國玩完就送咗盒蛋糕粉過我！

擺咗一排都唔想整嚟食，

因為好怕呢 D 蛋糕 Mixing 粉會好甜！

細囡豬話可以加多 D 可可粉嚟中和番甜度，

最後都加咗成 100g 嘅可可粉先至無咁甜！

細囡豬跟足包裝盒嚟整 Icing ， 

最後再加 D 朱古力條嚟做裝飾，

總算攪掂咗！

大豬小姐都話味道幾特別！

青蘋果 Cupcake

細囡豬都有一段時間無整 Cupcake 拎返學校嘞 !

佢哋班同學就輪流嚟帶返去 Share 嘅，

其實又唔一定要自己整 Cupcake 嘅；

有 D 同學只係喺 Cake Shop 買就算。

不過細囡豬有個老師唔食得奶類製品，

所以佢就鍾意自己整囉 !

佢今次仲買咗 D 甜嘅青蘋果嚟整，

再用豆製忌廉 + Icing Sugar  + 固體菜油嚟打成 Cream， 

味道唔會太甜，

我都鍾意食 !

初時我仲以為已經整完 D Cupcake ，

點知原來仲有 D 嘢加喺 Icing Sugar 面；

事關佢一開始煮咗 D 焦糖係另有用途嘅，

佢覺得加 D 原粒青蘋果就會特別啲 !

我問佢喺邊度揾到呢個食譜，

佢竟然話係佢自己諗嘅，

好彩佢 D 老師同學食咗都無投訴 !