柱喉炆牛腩

自從細囡豬唔食牛肉，

大豬小姐又上咗大學，

咁我就極少買牛肉嚟食嘞 !

早排大豬小姐放假返嚟，

咁我知呢個牛魔皇無牛不歡，

所以就整咗一煲炆牛腩過佢食嘞 !

1 Kg. Roast Beef ,

爆香薑塊、蒜頭同乾蔥頭，

加入已出水嘅牛腩件略炒，

再加入三湯匙柱喉醬然後兜勻，

將果皮、八角同冰糖加入，

注入熱水到牛腩面再上蓋，

待大滾後轉細火炆一個鐘調味即成。

大豬小姐愛食紅蘿蔔，

咁我就加咗三條一齊落去炆嘞 !

親子時間

呢豎唔似得香港咁方便，

隨時可以出街就食到好嘢！

所以好多時我哋都會喺屋企自己整嘢食！

反而咁樣就可以有好多親子時間，

仲好互動！

又可以有 D 勢藝攪吓！

我都覺得又可以拉近屋企人嘅距離！

呢日晏晝我哋又玩 DIY 格仔餅嚟食嘞！

好多時炆嘅餸留喺第二日係入味 D，

果然隔日食呢個"紅酒燴牛尾"係超正！

夜晚就淥咗 D 意粉嚟消滅咗部份牛尾！

事關大豬小姐仲話紅酒燴牛尾跟意粉係夾 D 喎！

紅酒燴牛尾

大豬小姐放假返嚟屋企，

話咁快仲有幾日又要返上利物浦嚕！

今日再問佢想要食 D 乜？

佢竟然話唔要食生炒糯米飯，

亦唔要食 DIY 燒肉，

寧願揀紅酒炆牛尾喎！

我又點會令佢失望呢！

買齊材就開工整過佢食！

穩陣起見，

上 YouTube 睇吓人家點煮好 D ！

材料：

牛尾 約 1 kg 

洋蔥切絲  1 個

西芹 2 條

甘筍 2 條

蒜頭 2 粒

紅蔥頭 2 粒 (切片)

蕃茄 4 個

茄膏 2 湯匙

香葉 2 片，

紅酒 (細支) 250 ml

調味料：

紅酒 1/2 杯，

冰糖 10g，

生抽  2 1/2 茶匙，

水 2 杯，

胡椒粉少許

做法：

1. 西芹，甘筍，切件。爆香洋蔥，盛起。

2. 牛尾洗淨，抺乾水及沾上粟粉。燒熱油，煎香牛尾，盛起。

3. 爆香紅蔥頭，蒜頭，下蕃茄略炒，加入牛尾，香葉及調味料煮滾，轉小火煮2小時。

4. 放入已爆香洋蔥，西芹及甘筍兜勻，再煮 30 分鐘至肉稔及汁略杰身，加紅酒２湯匙，
炒勻­煮滾即可。

# 1杯 = 250毫升

*四人份量

Easter Sunday

20 號係 Easter Sunday ，

我呢度大部份嘅店舖都休息，

只有少數嘅餐廳會營業，

再加上呢豎落雨就梗加路人稀疏！

由於細囡豬要補習，

所以我哋都要去 Guildford 揾食！

最後我哋都係想食飯麵，

所以就去咗 Wagamama！

本來屋企附近都有佢哋嘅分店，

只可惜廚師功夫唔得，

所以已經多年無幫襯佢哋嚕！

早排呢豎水浸，

近日重新開張，

好彩呢間嘅廚師煮功依然！

大囡豬必食嘅咖喱雞飯，

細囡豬大大碟嘅炒烏冬就要我哋幫口！

什錦 Soba 都唔差，

可惜味道偏淡，

要加 D 豉油先係啱我嘅口味！

希望佢哋可以保持水準，

咁我哋可以有間就腳嘅麵店嚟食吓！