8 - 8 - 2013 (星期四)
妹妹知我鍾意食蟹,
佢喺網上 Open Rice 見到 "喜記" 嘅消息,
而我同大豬小姐都未試過呢間嘅 "避風塘炒蟹",
雖然套餐唔多啱我哋食,
不過,
我哋決定都去試吓!
五大兩小去到竟然坐張十人枱,
嗰位部長話可以坐得鬆動 D 喎!
又有夜景睇,
雖然角度同環境就無上次嗰間咁正,
但係都好過無啦!
諗住趁阿 Sir 7:00pm 未到就先歎一碟 '避風塘炒蜆'先啦,
點知成碟蜆都只係和暖嘅,
最怕食 D 唔凍唔熱嘅嘢!
唯有話畀部長知,
點知佢哋只係原碟放入蒸爐蒸番熱就攞出嚟畀我哋食,
真係咁都得 ?
不過不失嘅 "避風塘炒麵"
大人小朋友都鍾意食嘅 "椒鹽魷魚"!
有 D 老嘅 "油鹽水浸韭菜花",
全晚最熱辣辣嘅 "啫啫生菜煲"!
唔甜、唔酸兼無肉味嘅 '荔枝咕嚕肉',
連兩個小姨甥都話唔多吼!
全晚焦點所在,
千呼萬喚先上枱嘅 "避風塘炒蟹",
賣相都幾得喎!
點知一食就確實令人極到失望,
味道唔在講,
未劏佢之前都已經見過一面嘅所謂 "肉蟹",
連埋蟹鉗全碟都無幾件,
入口就知佢係一隻 "水蟹",
唔通被人掉咗包?
唔食團購餐都食 D 咁嘅嘢,
如果食團購餐會點呢?
呢間 "喜記" 唔通又係被盛名所累?
怕扯以後都唔使再嚟幫襯喇!