扯走樹根

英國生活指數高，

有時都要諗吓計仔 "開源節流" 先得 ，

正所謂 "少數怕長計" 吖嘛 !

尤其係水、電、煤氣都係超貴 !

屋企雖然只得我同細囡豬兩個人住，

D 水費每個月要都畀五十鎊，

又確係好肉赤 !

其實英國嘅水費係有兩種收費，

無安裝獨立水錶就係論人頭估計，

當然就有估多無估少喇 !

如果嫌貴就可以申請安裝獨立水錶 !

我有好多朋友都安裝咗獨立水錶就確係慳番唔少 !

終於 "的起心肝" 先喺網上申請，

原來要三個月先完成安裝嘅 !

手續都唔算太繁複；

相隔咗幾日就有專人打電話嚟約期睇地方 !

技師先嚟揾個街喉，

仲出動個金屬探測器嚟搜尋；

終於喺屋企前門揾到個水喉總制，

不過就要剷走 D 樹 !

我唯有動手先剪走 D 樹幹，

估唔到剪出嚟嘅樹枝都有成兩大黑色垃圾膠袋，

但係樹根就好強頑，

掘極都掘唔走個樹根，

仲攪到對手同條腰都好酸痛；

最後唯有放棄 !

第二日老外鄰居 Chris 路過；

見我前門攪成咁樣，

佢就嚟㩒門鐘問我發生咩事，

最後佢仲自動請纓嚟幫手整走個樹根喎 !

原來佢係揸架 Van 仔嚟用繩索扯走個樹根，

尼龍繩索都拉斷咗一條先攪掂 !

過程都確係幾艱鉅同危險㗎 !

又再見證一次 "遠親不如近鄰" 嘞 !

真係感激無限 ~ ~ ~

仲要等多一個月先正式嚟安裝個水錶，

希望到時順順利利喇 !

仲有意外收獲 ~~~ 

就係用個金屬探測器揾到個 "日規" 喎 !